Presentada de su libru "Metropolitània e àteros.contos tópicos, distópicos, utópicos", Tàtari 18 de Santu Gaine 2019 de Paolo Mugoni
(Venerdì 18 ottobre 2019, presso la Libreria Messaggerie sarde,in Sassari, è stata presentata Metropolitania..., di Giuseppe Corongiu, una raccolta di racconti in lingua sarda, edita in questo stesso anno da Palabanda Edizioni di Cagliari. Alla presenza dell’autore e di un folto pubblico, ha introdotto l’iniziativa Paolo Mugoni, della redazione della rivista “Camineras”, ha dialogato con l'autore Federico Francioni. Letture del testo sono state effettuate da Clara Farina. Di seguito proponiamo il testo integrale dell’intervento di introduzione svolto da Paolo Mugoni).
Benennidos a totu, mi faghet praghere
de bos bidere inoghe pro ascurtare sa presentada de custu libru in sardu
“Metropolitània e àteros.contos tópicos, distópicos, utópicos”, no est ogni die
chi in Tàtari, ma podimus nàrrere in tota sa Sardigna, b’apat presentadas de
literadura in sardu. Est beru, de presentadas de premios e de libros de
poesias, pro fortuna, bi nd’at mai cantos, ma sas presentadas de romanzos e
regortas de contos comente a custu sunt de aberu pagos.
Custu proite
in Sardigna sa manera de faghere literadura finas a sos primos annos otanta si
frimmaiat a sa poèsia, comente chi custa esseret s’unica manera de contare e de
si contare chi sos sardos connoschiant. Est bistadu cun iscritores comente Larentu
Pusceddu, Antoni Cossu, Mialinu Pira, Benvenuto Lobina, Giuanne Frantziscu
Pintore, e àteros chi est comintzada cussa chi podimus cramare sa literadura
moderna sarda. Dae tando medas autores ant iscritu romanzos, regortas de
contos, dende vida a una produtzione chi sia in numeru chi in calidade at
comintzdu a èssere de importu.
Tzito unos
cantos autores pro nàrrere chi semus oramai arrivados a prus de 300 òperas de
narrativa in sardu; Nanni Falconi, , Antoni Arca (dovimus tzitare finas sa
produtzione teatrale de custu autore e paris cun issu cussa de Lenardu Sole),
Antoni Buluggiu, Giuanne Piga, Paola Alcioni e Antonimaria Pala, Paulu
Pillonca, Franciscu Carlini, Micheli Ladu, sena ismentigare sos autores in sas
limbas alloglotas comente Palmiro de Giovanni chi in Tàtaresu at iscritu su
romanzu Climintina, su castellanese Giuseppe Tirotto e su isulanu Gian Carlo
Tùsceri.
In custa
creschida de sa literatura sarda no nos podimus ismentigare cussos editores
coragiosos chi ant dadu visibilidade a sos autores sardos. Condaghes chi cun sa
collana Paberiles at publicadu una parte importante de custos iscritores (47),
sa domo editoriale de Nugoro, Papiros chi est istada una de sas primas a
cumprendere s’importantzia de su romanzu in sardu, Alfa de Cuartu Sant’Aleni,
come s’est agiunta Palabanda editziones de Casteddu, domo editoriale de custu
libru, e bind’at àteras chi si puru minores ant muntesu s’impignu de publicare
in sardu.
In sa
literadura, mescamente in sa narrativa, est importante s’impreu de una limba
istandard, una limba natzionale proite gai sos romanzos, sos contos podent
bessire dae cussu cugiolu de sa bidda de s’autore o de sas biddas a lacana inue
a bortas sunt istados cunfinados, custu sutzedet impreende una limba cun
regulas siguras e chi si potzat cumprendere in ogni giassu de Sardigna.
Mescamente in
sa literadura, ma finas in sos àteros setores de sa sotziedade moderna (Iscola,
Internet, sos sotzial media), s’intendet sa netzessidade de una limba natzionale,
cun regulas de iscritura pretzisas in totue. Sa chistione de unu mercadu
pro sa literadura in sardu est unu de sos problemas prus mannos chi amus, sas
pagas bendidas no incoragiant a iscriere romanzos in sardu, mescamente sos
giovanos chi, in manera legìtima, si cherent fàghere connoschere che
iscritores. Pro ponnere rimediu a custa cosa est de importu s’impreu de
s’istandard e de unu mercadu regionale.
A como amus
prus che totu s’impreu de una limba istandard in unos cantos romanzos de sos
urtimos annos chi sunt istados iscritos cun sa LSC (limba sarda comuna) chi est
istada impreada finas pro sas bortaduras de sos classicos de sa literadura
internatzionale. Unu de sos urtimos traballos de bortadura, pro esempru, est
istadu “Don Chisciote de sa Màntzia”, bortadura fata dae su giovanu istudiosu
balente de Tàtari Gianni Muroni e editadu dae sa domo editoriale
“Condaghes” e bessidu in sa collana “Sena Làcanas.
Faeddamus como
de s’autore;
Chie est
Giuseppe Pepe Corongiu? Pepe Corongiu est unu iscritore, saggista, militante de
primore de su moimentu pro sa limba sarda.
Est naschidu
in Làconi (NU) in su 1965. Est cojuadu e tenet unu fìgiu. Bivet in
Casteddu,. Laureadu in Lìteras Modernas in s´universidades de Casteddu.
Giornalìstica (est iscritu a s’Òrdine de sa Sardigna in calidade de
professionista).Dirigente de su comunu de Cuartu sant’Aleni.
Dae su 2008 a
su 2014 est istadu su primu diretore de su Servìtziu Limba e Cultura Sarda de
sa Regione Autònoma de sa Sardigna in s'Assessoradu de sa Pùblica Istrutzione.
Sas atividades fatas sunt medas. Nde tzito solu calecuna:
Su sardu cdurriculare in s’iscola cun sa lege 482/99
Pianos Triennales de sa Limba 2008-2010 e 2011 – 2013 (lege
26)
FILS – Formatzione de sos insegnantes de limba sarda in collaboratzione cun sas universidades de Casteddu e Tàtari
CUBAS – Cursu de alfabetizatzione bàsica de su sardu Casteddu e Tàtari –
LSC – Progeto de sa Limba Sarda Comuna – Gestione, coordinamentu.
CROS – Curretore Ortogràficu Regionale de su Sardu. Prataforma in sa cale est possìbile currigire de sos testos in limba sarda respetu a sas normas ortogràficas e linguìsticas.
Òperas
printzipales:
Cento Giorni
di Pantera Sarda, Palinsesto Cuec, 1991.
Una limba pro
guvernare, Condaghes, 2004
Pro una limba
ufitziale. Domus de Janas, 2006
Il sardo, una
lingua normale, Condaghes, 2013
In su 2017
pubblicat su contu in sardu “Dae Casteddu a Mandas” in sa regorta de sos
autores sardos dedicada a Lawrence, Back to Sardinia, pubblicada dae Condaghes.
Bortat in
sardu sos contados pro s'infàntzia de Antonio Gramsci publicados in su volùmene
“S'àrbore de s'eritzu”,
Metropolitània
e àteros conto tòpicos, distòpicos e utòpicos, Palabanda Edizioni, 2019
METROPOLITÀNIA…..
Su libru chi
cuntenet 12 contos est iscritu in sardu, pretzisamente cun s’impreu de
s'istandard LSC (Limba Sarda Comuna). S'autore afrontat diversos gèneres literàrios,
s'andat dae sa fantascièntzia a sos contados eròticos, a cussos polìticos, a
sos contados de amore a sos tempos de sos social e a sos contados grogos. Unu
filu ruju aunit totu e dòighi sos contados: s’istima de s'autore pro sa
Sardigna e pro sa limba sarda.
Sos dòighi
contados sunt situados in una Sardigna cuntemporànea, mescamente tra sos annos
otanta e noranta de su sèculu colau chi nos che torrant a leare in argunos de
sos contados a una Sardigna galu prena de isperas in unu cambiamentu e riscatu
possibile.
Su libru
paret, leendelu in cunsidèriu totu intreu, unu libru polìticu, inue s'autore
sutalìniat sa bisione sua de sa Sardigna, s'ispera sua de una liberatzione de
unu destinu de declinu e sutamissione chi paret immutàbile.
Semus in
presèntzia de una Sardigna a foras de sos istereòtipos de un'identidade solu
rurale, incarrada in una dimensione urbana e moderna. In custu sensu su libru
paret, dae su puntu de vista literàriu, “rivolutzionàriu”, superende in medas
de sos contados cussa traditzionale bisione antropològica chi at, sarvu carchi
etzetzione de balore, bona parte de sa literadura sarda finas a oe.
Si bidet
difatis chi sos protagonistas de carchi contadu sunt de su totu in un'ambiente
urbanu, burghesu, de una burghesia chi tenet orìgines in àmbitu rurale ma una
bia urbanizzada leat connotados universales, chi si podent agatare in ogni logu
de su mundu. Emblemàticu de sa connotatzione polìtica chi tenet su libru est su
primu contadu Metropolitània, belle unu romanzu curtzu chi at i se matessi bona
parte de sas temàticas afrontadas in su libru e chi si còllocat in sa
traditzione de sa literadura fantascientifica; una traditzione capatza comente
a pagas de contare sos temas chi sunt cambiende su mundu: sa tecnologia, sa
globalizatzione, s'ingegneria genètica, sa robotica sos disastros ambientales,
sas gai cramadas gherras intelligentes, sas mudaduras mannas geopolìticas, sos
tzentros de pòdere globalizados. Mescamente in sos aspetos ligados a su pòdere
si podet tzitare carchi testu sacru de sa literadura fantascientifica e tra
custos Fahreneight 451 e 1984, no apàrgiant allettore irriverente S'ìsula de
Metropolitània, est una terra militarizzada, est una colònia penale, depòsitu
de iscòrias nucleares, de refudos tòssicos e de fàbricas tra sas prus
incuinantes, minieras de minerales raros. Comente a non bìdere in custa
rapresentatzione su destinu de sa nostra amada Sardigna, chi addae de sas
immàgines stereotipate de sole, mare e natura incontaminada at intro de se
medas de custos perìgulos. Su chertu de unu de sos protagonistas Àrcons e su
percursu de su suo antagonista Sirius est sa rapresentatzione plàstica chi a
custu destinu faghet a si opònnere
Unu aspetu
innovativu est s'impreu de sa limba sarda, cun una richesa de tèrmines,
neologismos e geosinonimos de su totu in gradu de rapresentare sa sotziedade
cuntemporànea sena rùere in fàtziles folclorismos. Una limba moderna, cussa
impreada dae s'autore, cumplessa ma non cumplicada, filologicamente e
etimologicamente rigorosa, in unu cunfrontu continu cun sa modernidade e
capatza de inditare unu percursu nou de crèschida pro su sardu, mescamente in
sa limba literària.
Commenti