LITERADURA E LIMBA SARDA Presentada de su romanzu de Antonio Corsarcata: Tilda de Reni Atora Bortadura in sardu de Antoni Buluggiu



Chenàbura ses de freàrgiu a sas ses de sero in s'Istitutu tècnicu industriale G.M. Angioy de Tàtari “Sòtziu de sos Sardos”, periòdicu Camineras e Sòtziu “Pro no ismentigare presentant su romanzu de Antoni Corsarcata “Tilda de Reni Atora”, bortadu in sardu dae Antoni Buluggiu. Nde faeddant Antoni Arca, coautore de su romanzu, e Pepe Corongiu, de su Coordinamentu sardu ufitziale, cun interventos de Federicu Francioni e Pàulu Mugoni, redatores de su periòdicu Camineras. Sa dibata at essere moderada dae Ninni Tedesco, diretora de su periòdicu matessi.
Su nùmene de s'autore, Antoni Corsarcata est una fintzione chi costoit un'idea noa in cantu su nùmene de s'autore est unu progetu leterariu chi ponet a pare Còrsica, Sardigna e Catalugna, invitende sos autores de sas tres realidades limbisticas a si aunire pro sa nàschida de iscritos originales; pro s'ocasione sunt istados cramados su corsicanu Ghjacumu Thiers, su sardu Antoni Arca e su cadalanu Jordi Buch Olivier. S'obera est “Quando so spenti i lumi” in sa versione corsa, “Tilda de Reni Atora in sa versione sarda e “Tilda de Reni Attrice” in sa versione italiana, sos ùrtimos duos publicados dae NOR de Ilartzi.
Su romanzu faeddat de unu giòvanu romanu, àpenas laureadu cun una tesi supra s'istòria de su tzìnema, a su cale ant pedidu de torrare a pitzu s'istòria e sa biografia de Tilda de Reni, istedda de su tzìnema mudu europeu de sa cale no s'ischit prus nudda. De issa s'ischit solu chi est nàschida in s'Alighera in sos primos de su noighentos e nudda àteru. Su giòvanu romanu, un' azigu impedidu, arribat in sa costera de su coraddu in su 1985, in sas dies de sa festa de s'Avanti, e est postu in mesu a trassas de politicantes minores, interessados prus a s'interessu issoro chi a sa chirca de sa veridade subra s'istòria de sa femina chi in gioventude at àpidu solu duas curpas: essere nàschida in una famìllia pòbera e essere tropu bella pro no essere carculada. Su contu s'isvilupat subra tres pianos: su contu corsu cun sas boghes de sos testimòngios chi la bideint fuire in Còrsica dae s'Alighera, su contu de sa glòria tzinematogràfica curtza bartzellonina de sa protagonista de unos cantos film osè, su tempus presente datadu 1985 inue si contat de chie cheret fartzare su tempus coladu de una pòbera betza pro megiorare su propriu presente mìseru.
Su libru si podet comporare, comente ebook in sa versione sarda e italiana in sos canales de sa retza. At a essere presente fintzas s'editore de su romanzu Frantziscu Cheratzu. In sa serada nd'at leghere branos s'atora Clara Farina acumpangiada dae momentos musicales a incuru de Antoni Solinas, istudiante de s'ITI Angioy. S'abboju est fintzas s'ocasione pro ammentare duos amigos corales, fundadores e redatores de su periòdicu Camineras chi sunt bènnidos a mancare dae pagu:
Antoni Buluggiu, insegnante in pensione de s'ITI Angioy e autore de su romanzu in sardu “Lughes Umbrinas”, editziones Condaghes, chi est istadu su bortadore in sardu de su romanzu presentadu, militante polìticu de su Pòpulu sardu e de su Psd'Az, intelletuale de gabbale e Salvo Zedda istudiosu de economia, militante polìticu de “Giustizia e libertà” e autore de artìculos de importu chi ant dadu lughe manna a su periòdicu Camineras.




Commenti